د ملي امنیت شورا دفتر د مشرتابه په کچه نوې ګومارنې رامنځته شوې

د افغانستان د ملي امنیت شورا دفتر په وړاندیز او د جمهوري ریاست د عالي مقام په منظورۍ:
ښاغلی محمد سلیمان کاکړ په مافوق رتبه بست کې، د ملي امنیت شورا دفتر د انکشافي او ولسي چارو د ستر معین؛
ښاغلی تورن جنرال یما کرزی په مافوق رتبه بست کې، د ملي امنیت شورا دفتر د ستراتېژیکو ګواښونو او اطلاعاتو د ارزونې معین؛
ښاغلی عبدالحکیم نورزی په مافوق رتبه بست کې، د ملي امنیت شورا دفتر د داخلي تفتیش معین؛
د ملي دفاع وزارت مخکینی لومړی مرستیال، ښاغلی ستر جنرال خالق خان سروري د سترجنرالۍ په بست کې، د ملي امنیت شورا دفتر د وسلوال پوځ د اعلی سرقوماندانۍ معین؛
ښاغلی تورن جنرال بهادرشاه احمدي د ډګر جنرالۍ په بست کې، د وسلوال پوځ د اعلی سرقوماندانۍ مرستیال او د مالوماتو تنظیم عمومي رییس؛
ښاغلی ډګرجنرال محمد دوران، د ملي د هوایي ځواکونو د ملاتړ په برخه کې، د ډګر جنرالۍ په بست کې د وسلوال پوځ د اعلی سرقوماندانۍ مرستیال؛
ښاغلی ډګرجنرال خدای داد د ډګر جنرالۍ په بست کې، د وسلوال پوځ د اعلی سرقوماندانۍ د سرمفتش؛
ښاغلی ډګروال ولایت شاه بهرامي د برید جنرال په بست کې، د وسلوال پوځ د اعلی سرقوماندانۍ د سرمفتش مرستیال؛
او ښاغلی محمد صالح د برید جنرال په بست کې، د وسلوال پوځ اعلی سرقوماندانۍ د ستراتېژیکو پلانونو ریاست د مرستیال په توګه پر دندو ګومارل شوي دي.
د جمهوري ریاست د عالي مقام د بل ځانګړي حکم پر اساس، ښاغلی ستر جنرال محمد افضل لودین، د جمهوري ریاست د لوړ مقام د ستر پوځي سلاکار په توګه پر دندې ګومارل شوی دی.
په هغو مراسمو کې، چې د ملي امنیت شورا دفتر په چوکاټ کې د نویو ګومارنو د معرفۍ په موخه جوړ شوي وو، د ملي امنیت سلاکار ښاغلي محمد حنیف اتمر وویل: د لوی خدای(ج) په فضل او د جلالتمآب جمهور رییس د ځانګړې توجه له مخې، د ملي دفاعي او امنیتي ځواکونو په لیکو کې، د هغو اصلاحاتو د تطبیق لپاره، هره ورځ ګامونه اخلو، چې د وارسا په کنفرانس کې یې په اړه د افغانستان دولت له نړېوالو همکارانو سره تعهدات کړي دي. د ښاغلي اتمر په وینا له نویو ګومارنو سره به د ملي امنیت شورا دفتر په لا ډېر فعال، موثر او مسلکي ستراتیژیک- امنیتي بنسټ بدل شي. د ملي امنیت سلاکار، پر نویو ګومارل شویو کدرونو غږ وکړ، چې د هېواد حساسو امنیتي شرایطو ته په کتو، د ملي دفاعي او امنیتي ځواکونو او اورګانونو ترمنځ د همغږۍ او د ملي امنیت شورا د پرېکړو د تعقیب او تطبیق لپاره په اخلاص او قوت کار وکړي.
په دې مراسمو کې، د ملي امنیت شورا دفتر نویو مرستیالانو او جنرالانو هم خبرې وکړې او د هېواد د رښتیني خدمت لپاره یې د هر راز سرښندنې او قربانۍ ډاډ ورکړ.
په دې مراسمو کې، د ملي دفاع او کورنیو چارو وزارت معینانو او چارواکو هم برخه اخېستې وه.