به گزارش مرکزی آژانس خبری فرحت،منابع در شورای عالی مصالحه ی ملی افغانستان میگوید: دوکتور عبدالله عبدالله رییس شورای عالی مصالحهٔ ملی صبح امروز(دوشنبه، 7 میزان) به دعوت رسمی عمران‌خان صدراعظم پاکستان در رأس یک هیأت بلندپایهٔ حکومت افغانستان عازم اسلام‌آباد شد.
در این سفر، رییس شورای عالی مصالحهٔ ملی در پیوند به تلاش‌های صلح پایدار، با عزت و عادلانه در افغانستان با رهبران ارشد پاکستان بحث و تبادل نظر می‌کند.
دوکتور عبدالله عبدالله، رییس شورای عالی مصالحهٔ ملی در جریان اقامت خود در پاکستان با دکتور عارف علوی رییس‌جمهور، عمران‌خان صدراعظم، اسد قیصر رییس مجلس نمایندگان،محمد صادق سنجرانی رییس مجلس سنا، شاه‌محمود قریشی وزیر امورخارجه، جنرال قمر جاوید باجوه رییس ستاد ارتش و سایر مقامات این کشور ملاقات می‌کند.
رییس شورای عالی مصالحهٔ ملی را در سفر به پاکستان معاونان شورای عالی مصالحهٔ ملی، مشاوران و تعدادی از شخصیت‌های سیاسی کشور همراهی می‌کنند.
این نخستین سفر دکتور عبدالله عبدالله در یک دهۀ اخیر به پاکستان می‌باشد. رییس شورای عالی مصالحهٔ ملی قبل از سفر به اسلام گفت: «در سفر به این کشور با رهبران و مقامات عالی رتبهٔ پاکستان در بارهٔ تلاش‌های صلح صحبت می‌کنیم.
امیدواریم با سفر به اسلام آباد فصل تازه‌ای از همکاری‌های مشترک میان دو کشور در عرصه‌های مختلف به ویژه برقراری صلح پایدار و با عزت باز گردد.»
احسان الله صدیقی
فرحت نیوز/کابل
